Geguritan Katresnan

GEGANTHILANING ATI

Dening : Isna

Ngger anakku...

Sira kabeh anakku  catur

Awakmu kabeh tansah kumanthil kanthi ing netrane sibu

Tansah dadi geganthilaning ati

Le ... ndhuk... anakku sing tansah dadi sinambating tyas

Rina wengi rama lan ibu tansah andedonga

Dadya sira kabeh manungsa utama

Sholeh sholehah migunani tumraping nusa bangsa

Nok cah ayu memanising ati bapa

Nang cah bagus pengarep-arepe biyung

Ngger anakku kabeh,

Padha mangertia apa kang dadi gegadhanganing wong tuwa

Dudu emas raja brana kang kasuwung minangka pisungsung

Uga dudu raja kaya bandha kang dadi piwales sira ing tembe

Mung siji kang tansah rama lan ibu arep-arep

Dadya manungsa kang utama kang miguna marang sapepadha

Anakku kabeh sing dadi geganthilaning ati

Pancen dudu bandha sing bisa kaparingake

Mung ilmu kang bisa dakwenehake minangka sangu donga pangestune rama lan ibu tansah kasok marang sliramu

Muga kabeh slamet kalis ing sambikala

Tansah mukti wibawa sadawaning urip ira.

Kendal, 11 April 2011

Kanthi sih tresnaning tyas mami

Sumber : Pembelajaran Bahasa Jawa SMP/MTs kelas VII