Cerita Asal Usul Desa Pejaten Krikil

Asal Usul Desa Pejaten Krikil

Dening : Tri Setyoningsih

Jaman biyen ing taun 1400 Masehi, desa Pejan ditekani wong saka Majapait jenenge Mbah Kyai Wongso Citra. Dheweke iku isih keturunan para wali. Kekarepane mara ana ing desa Pejan, yaiku arep nganakake kesenian tabuh gamelan Jawa (karawitan). Tujuwane uga arep ngenalake budaya marang masyarakat supaya bisa ngerti yen wong Jawa iku nsugih kabudayan. Salah sijine yaiku mau, kesenian nabuh gamelan (karawitan).

Sabenere ana maksud sing paling utama saka eyang Kyai Wongso Citra. Sak liyane arep ngenalake kesenian Jawa, uga arep manfaatake gamelan kanggo sarana prasarana nyiarake agama Islam. Ngerti kabar iku, banjur para wali (wali sanga) teka ana ing desa Pejan kanggo nemoni eyang Kyai Wongso Citra. Sunan bonang maringi wejangan-wejangan marang eyang anggone nyiarake aga Islam lawan syi’ir kesenian karawitan. Durung kasi kelakon anggone mujudake niat luhur kuwi mau, eyang Kyai Wongso Citra seda mulih ana ngarsane Gusti. Para wali ngluru cara supaya niat kanggo nyiarake agama (dakwah lawan syi’iran) tetep bisa kaleksanan.

Masyarakat ing desa Pejan ora mangerteni apa sing kedadeyan ana desane. Ana ing makome eyang Kyai Wongso Citra iku ana watu sing bentuke gamelan wujude bonang jumlahe 6. Merga pancen almarhum eyang Wongso Citro iku seneng banget karo karawitan. Tiap malem jum’at, ing wetan desa kana mesthi ana suwara wong nggepuki watu, jebule pancen ana  para wali sing lagi pada mandek. Ora trima pada mandek, nanging arep njaga desa Pejan lan nyambi gawe alat-alat saka watu kaya lumpang, cowek, muthu, lan sak liyane. Mula dalan wetan desa Pejan iku diarani andheg-andhegan.

Murid-muride eyang Kyai Wongso Cita uga dipercaya para wali supaya bisa nerusake perjuwangan nyiarake aga Islam marang anak putune. Wong-wong tonggo desa tansaya suwe tansaya akeh sing melu ngaji maca sholawat lawan syi’iran. Suwene jaman tansaya maju, tinemu pikiran yen ning desa Pejan kuwi akeh watu-watu sing bisa menehi manfaat kanggo gawe. Kesadaran kanggo golek ilmu uga tambah apik perkembangane.

Desa Pejan sing panggonane ana nggunung, nggawe masyarakat tangga desa kudu munggah ondo ibarate. Mula pamikirane menawa arep maring desa Pejan sing akeh watu krikile kuwi, kudu manjat dhuwur kanthi tlaten.merga ngono mula desaku sing maune jenenge Pejan banjur malih dadi desa Pejaten Krikil.